إزاي تعمل عقد وفاتورة
"إحنا مش محتاجين عقد، إحنا بنثق في بعض"
الجملة دي سمعتها قبل ما اخسر فلوس
العقد مش علامة إنك مش بتثق في العميل، دي الحاجة اللي بتحميكم الاتنين لو حصل أي سوء تفاهم
إيه اللي لازم يكون في أي عقد
طرفي العقد: اسمك واسم العميل وبيانات التواصل
نطاق الشغل بالتفصيل: إيه اللي هتعمله بالظبط، وإيه اللي مش داخل في الاتفاق. ده أهم بند في العقد لأنه بيمنع الـ Scope Creep ( العميل اللي بيخرج عن عن المطلوب )
المواعيد: تاريخ البداية وتاريخ التسليم، مع توضيح إن التأخير من طرف العميل بيأثر على المواعيد
التسعير وطريقة الدفع: المبلغ الكامل، والدفعات (مقدم، أثناء، و تسليم)، وطريقة الدفع
عدد الـ Revisions: كام تعديل داخل في السعر، وإيه تكلفة التعديل الإضافي
ملكية الشغل: الشغل بيبقى ملك مين قبل الدفع الكامل؟ الإجابة الصح: إنت
إنهاء التعاقد: لو الاتنين عايزين يوقفوا، إيه الإجراء؟
الدفعات + المقدم
أي فريلانسر اشتغل من غير مقدم اتعلم الدرس بالطريقة اللي بتوجع
المعيار المتعارف عليه:
50% مقدم قبل ما تبدأ
50% عند التسليم
لو المشروع كبير، تقدر تعمل: 30% مقدم ← 30% منتصف ← 40% تسليم
مفيش مقدم = مفيش شغل
لحظة الـ "F*ck You, Pay Me"
المخرج مايك مونتيرو عمل محاضرة شهيرة عن حقوق الفريلانسرز والعملاء اللي مش بيدفعوا:
لو مش قادر تشوف الفيديو، الفكرة الأساسية: مش هتسلم شغل من غير ما تتقبض. قانونياً وأخلاقياً الشغل ملكك لحد ما العميل يدفع
الفاتورة
الفاتورة هي الوثيقة الرسمية اللي بتطلب بيها الفلوس بعد ما تخلص الإتفاقية
الفاتورة لازم فيها:
- رقم الفاتورة (ابدأ من 001 واكمل)
- تاريخ الإصدار وتاريخ الاستحقاق
- اسمك وبياناتك
- اسم العميل وبياناته
- تفاصيل الشغل والمبلغ
- طريقة الدفع
أدوات مجانية
لو عميلك أجنبي: اداة Freelancers Union Contract Creator - بيساعدك تعمل عقد احترافي للعملاء الأمريكان مجاناً
عقود مفتوحة المصدر: نماذج لعقود جاهزة
للفواتير:
- أداة Invoice Ninja - مجاني وopen source
- أداة Zoho Invoice - مجاني لحد 5 عملاء
المحتوى ده معلوماتي عام. لو في نزاع قانوني حقيقي، استشر محامي