إزاي تعرف سعر شغلك؟
أكبر غلطة ممكن تعملها إنك تحط سعر من دماغك من غير ما تعرف السوق. هتلاقي نفسك إما بتطلب أقل بكتير مما يستاهل شغلك، أو بتطلب أكتر من اللي السوق مستعد يدفعه
في 3 طرق عملية تعرف بيهم سعرك الحقيقي
الطريقة الأولى: شوف المنافسين
ادخل على Upwork أو Contra، ابحث عن ناس بنفس تخصصك وبنفس مستواك تقريباً، وشوف بكام بيشتغلوا نصيحة: اختار دول اللي دخلها عالي ومش منخفض زي (الهند، باكستان، بنجلاديش، الصين، مصر، السعودية والإمارات) الخ..
مش هدفك تطابق سعرهم، هدفك تفهم النطاق، يعني السعر بيتراوح بين كام وكام في مجالك
ابحث عن:
- فريلانسرز عندهم نفس عدد الـ reviews بتاعتك أو قريب منها
- نفس المجال والتخصص بالظبط مش عام
- نفس السوق اللي بتستهدفه، عملاء أمريكان ولا عرب ولا أوروبيين
الطريقة التانية: Glassdoor وLinkedIn Salary
ابحث على Glassdoor أو LinkedIn Salary Insights عن وظيفة بنفس مهارتك في البلد اللي عملاءك منها
لو بتشتغل مع عملاء أمريكان وإنت Social Media Manager، دور على متوسط راتب Social Media Manager في أمريكا
اقسّم الرقم ده على 12 شهر، وعلى 160 ساعة عمل في الشهر، هيطلعلك سعر الساعة التقريبي
ده مش سعرك بالظبط، بس بيديك فكرة عن إيه اللي العميل الأجنبي متعود يدفعه
الطريقة التالتة: اسأل في الكوميونتي
في ناس اشتغلت قبلك في نفس المجال، اسألهم
مجتمع r/EgyptianFreelancers فيه ناس بتشارك تجارب حقيقية و سؤال زي "بيشتغل بكام فريلانسر في مجال X مع عملاء امريكان؟" هيجيبلك ردود من ناس عندها تجربة فعلية
بعد ما عرفت النطاق، تحط سعرك إزاي؟
لو مبتدئ: ابدأ في النص السفلي من النطاق، مش الأدنى. الأدنى بيبعت رسالة غلط للعميل
لو عندك شغل في Portfolio: ابدأ في النص
لو عندك نتائج موثقة (زي "زودت مبيعات عميل بكذا%"): تقدر تبدأ من النص العلوي
حاجة مهمة
السعر مش ثابت للأبد
كل 6 شهور راجع سعرك. لو شغلك اتطور، لو Portfolio بتاعك اتحسن، لو عندك reviews كويسة، السعر لازم يعكس ده