المقدمة والعقلية؛ قصة ميشو والفرخة الذهبية
ميشو شاب مصري عادي. طالب أو خريج جديد، مش فارق. يوم من الأيام كان بيسكرول على يوتيوب ولقى فيديو عنوانه "كسبت 8 آلاف جنيه في يوم واحد من البيت!" الفيديو اللي وراه "سر الفريلانس اللي محدش بيقولك عليه" واللي وراه "تعلم البرمجة في 30 يوم وغير حياتك"
ميشو اشترك في القناة.
بعدين جه عم زيت، يوتيوبر محترم، كلامه منطقي، شاطر في الكلام، عنده شاشة تانية وميكروفون غالي. قاله إن الفريلانس ده "الفرصة الذهبية" واللي بيفوّتها غبي. وجه خالو مازن، كورس بـ 2,500 جنيه، "هتتعلم كل حاجة من الصفر لحد ما تكسب دولارات"
وكأن ده مش كفاية، في كل عزومة عيلة بيجي الخال اللي خلص دبلوم صنايع بيقول: "إيه يا ميشو، إنت لسه مش شغال فريلانس ازاي يابني؟ ده في ناس بتكسب آلاف الدولارات من موبايلهم!"
ميشو صدق
إيه اللي حصل بعدين
ميشو اشترى كورس البرمجة، خلص نص كورس "اول دولار اونلاين دلوقتي حالا بالا"، حس إنه مش "موهوب" للبرمجة، اشترى كورس ديزاين، عمل شوية لوجوهات بالـ Canva، حطهم على Fiverr، استنى شهر، مجاش أوردر. دور على كورس تاني يشرحله "ليه مش بييجي أوردرات"
ميشو لسه في الأول.. اضطر يتنصب عليه بعلمه، واشترك في كورس رمضاني اسمه البسبوسة سويا
المشكلة مش في ميشو
المشكلة مش إن ميشو كسول أو مش موهوب. المشكلة إن حد مقالش له الكلام الصح من الأول.
عم زيت وخالو مازن مش بيكدبوا بالضرورة، بس بيبيعوا الحلم مش الحقيقة. الفريلانس مش فرخة بتبيض دهب
الميزات حقيقية: أنت بتشتغل من أي مكان وبتحدد ساعاتك ودخلك مش محدود بمرتب ثابت
العيوب حقيقية برضو: مفيش تأمين صحي ( اقرأ قسم القانون والتأمين )، مفيش مرتب في آخر الشهر لو ماجبتش عملاء، ومفيش حد يشيل عنك مسؤولية لو الشغل اتأخر
العقلية الصح
الفريلانس مش بيضة دهب. هو قرار إنك تشتغل لنفسك، وزي ما أي مشروع محتاج وقت وجهد، ده برضو محتاج وقت وجهد
الناس اللي بتكسب فعلاً في الفريلانس مش كسبوا لأنهم اتعلموا "السر الخفي اللي محدش هيقولك عليه" كسبوا لأنهم:
- اتخصصوا في حاجة معينة وبقوا كويسين فيها
- اتعلموا يتكلموا مع عملاء
- فضلوا يشتغلوا حتى لما مجابتش نتيجة بسرعة
- اتعلموا من أخطاءهم مش من كورسات بس
المهم انت
لو جيت هنا وإنت زي ميشو الويكي دي مش هتبيعك حلم بس هتقولك الصورة كاملة الكويس والوحش والمتعب. وبعدين انت تقرر
لو قررت تكمل، الخطوة الجاية هي
اي تشابه بين الاسماء الموجودة والحقيقة هي من وحي خيال القارئ